LEGAZPI CITY-Nangapudan si Parañaque 2nd District Rep. Brian Yamsuan nin regular na pag-inspeksyon asin pagmantenir kan mga proyekto sa imprastraktura kan gobierno ngani masierto na ini magtetenir na ligtas asin may kalidad.
Sa House Bill 9780, pigpropwesto ni Rep. Yamsuan na an Department of Public Works and Highways (DPWH) magkondusir nin inspeksyon kada 5 hasta 10 taon pagkatapos an sarong proyekto.
Segun ki Yamsuan, importante an regular na pisikal na inspeksyon huli ta pwedisir maapektaran an durability kan mga proyekto kan panahon, overloading, asin iba pang bagay.
Katuyuhan man kan bill na masimbagan an problema sa mga lumang proyekto na dae mantinidong natatapos huli sa isyu sa property.
Ini naghahagad sa kagsadiri o legal na naggaggamit kan lugar na tugutan an gobierno na magsagibo nin inspeksyon, maintenance, pagkukumpuni o rehabilitasyon.
Pwedisir man mamultahan nin sagkod sa P50,000 an siisay man na makaulang o dai makalaog sa mga aktibidad na ini.
Sinabi ni Yamsuan na may katuyuhan an lakdang na maprotehiran an bilyones pesos na pondo kan publiko asin masierto na mapapakinabanganan mga proyekto kan gobierno sa halawig na panahon.
