LEGAZPI CITY—Inilansar kan Department of Agriculture – Philippine Fiber Industry Development Authority (PhilFIDA) sa pakikipagtabangan sa Department of Labor and Employment an sarong rapid rescue plan sa industiya nin abaca sa Bicol makalihis an pangrarapado kan bagyong Uwan.
Segun ki PHILFIDA Catanduanes Provincial Fiber Officer Bert Lusuegro, sa intrevista kan Bombo Radyo Legazpi, kabale sa nasabing lakdang an pagbarewas nin cash assistance asin iba pang tabang para sa mga paraoomang naapektaran kan nakalihis na bagyo.
Durante kan pag-oolay kan mga nasabing ahensya planong itagama an pondo nin P14 million sa isla-provincia kan Catanduanes an kantidad na P14 million, asin sa DOLE an may ipigtagama man na nasa labi P100 million na cash assistance.
Sa presente nagbabarewas man suboot an mga local government units asin iba pang non-governmental organization nin mga tabang sa mga apektadong paraooma sa nasabing provincia.
Dugang man kan opisyal na aabuton nin taon nganing makapagtanom liwat an mga abacaleros huli sa epekto kan bagyo.
Mientrastanto, nangangapodan man si Lusuegro sa iba pang ahensya na may extra na pondo na kun pwedesir na matabangan an nasabing sektor huli sa dae suboot kaya na masimbagan an gabos na pangangaipuhan kan mga paraooma kan saindang ahensya.
