LEGAZPI CITY—Arestado ka mga otoridad an Rank No. 1 City Most Wanted Person sa ciudad kan Sorsogon.
Segun ki Sorsogon City Police Station Chief of Police Police Lieutenant Colonel Christopher Aduviso, sa intrevista kan Bombo Radyo Legazpi, na pakababa kan mandamiento de aresto an tulos man naiserbi ini sa suspek.
An suspek binisto na si alyas “Tito Papoy”, 33-anyos, warang agom asin residente kan Barangay Bitan-o kan nasabing ciudad.
Nahahampang an suspek sa kasong statutory rape na warang pigrerekomendang piyansa.
Sa presente nasa kustodiya na kan Sorsogon CPS an suspek asin pakatapos kan saiyang proseso an ililipat na ini sa Bureau of Jail Management and Penology.
Nagpagiromdom man an opisyal sa mga magurang na dapat aram ninda an sitwasyon kan saindang mga aki 24 oras nganing maibitaran an ano man na klase nin pang-aabuso na pwedesir mangyari sainda.
