LEGAZPI CITY – Tiyaga, pagdedesider asin tiwala sa Diyos an nagin sekreto kan Rank 4 sa katatapos pa sana na March 2024 Licensure Examination for Teachers ngani na maabot an mga pangaturugan sa buhay.
Sa intrevista kan Bombo Radyo Legazpi ki Angelica Baroso, Rank 4 sa March 2024 Licensure Examination for Teachers, kadakol na mga pinag-agihan antes nakua an trayumpo sa nasabing eksaminasyon.
Sa katunayan, pighahagad sana ni Baroso na makapasar sa exam alagad sobra pa an tinao kan Diyos.
Inako kaini na pinakanadificilan sa time management huli ta pinagsasabay an pagtatrabaho asin pagre-review.
Alagad dae ini nagin ulang ngani na magin Rank 4 sa eksaminasyon huli sa makusog na suporta lalo na sa pamilya.
Dakula an pagtubod ni Baroso na edukasyon an pinaka-armas asin pinakamagayon na regalo sa sadiri kaya ginibo an gabos ngani na makagraduar asin makapasar dawa matindin an mga pinag-agihan.
Nangapudan man ini sa mga kajovenesan na dae pangluyahan nin boot dawa igwa nin mga pinag-aagihan sa buhay asin gibuhon kun ano an mawot.
