LEGAZPI CITY—Arestado an Rank 4 Most Wanted Person kan Bicol sa banwaan kan Daraga, Albay.
Segun ki Daraga Municipal Police Station Chief of Police Police Lieutenant Colonel Edgar Azotea, sa intrevista kan Bombo Radyo Legazpi, an suspek binistong 20-anyos, warang agom, sarong paratienda, asin residente kan Barangay Anislag sa nasabing banwaan.
Nahahampang ini sa kasong Statutory Rape na warang pigrekomendang piyansa asin Rape through sexual assault na may piyansang P120,000.
Sa presente, yaon an suspek sa kustodiya kan Daraga MPS para sa magkakanigong disposisyon.
Dugang ni Azotea na saindang pig-asigurar na makukua kan mga biktima an saindang hustisya.
Nagpatanid man ini sa namamanwaan na dae tulos na magtubod sa kun siisay an nakaka-ulay sa social media, asin an pagiromdom sa mga magurang na bantayan an saindang mga aki asin ipagsierto an saindang mga seguridad nganing malikayan an ano man na dae piglalaomang insidente.
