LEGAZPI CITY—Gadan an sarong persona na pigbistong Rabe Criminal Gang Leader asin pigkokonsiderar na Regional Most Wanted Person kan rehiyong Bicol sa pinagsarong operasyon kan Police Regional Office 5 asin Police Regional Office 4A sa Brgy. Lubigan, Guinayangan, provincia kan Quezon.
Segun ki PRO5 Regional Director PBGEN Andre Dizon, sa intrevista kan Bombo Radyo Legazpi, an suspetsado sarong 37-anyos, lalaki, asin residente kan provincia nin Albay.
Imbuelto an suspetsado sa kasong murder, homicide, ilegal na droga asin iba pang krimen.
Sinabi ni Dizon na sa pagserbi nin mandamiento de aresto laban sa suspetsado, nagbalo soboot ini na magtakas na nagresulta ngani na magkundusir sinda nin hot-pursuit operation sagkod na makipagbadilan an suspetsado sa kapulisan.
Saro sa mga kapulisan an nabadil sa may parte kan pandok asin sa presente nasa maray nang kamugtakan ini.
Dugang kan opisyal na wara nang buhay an suspetsado kan sainda ining nadukayan huli sa ginibong hot-pursuit operation.
Mientrastanto, nagpatanid man si Dizon sa mga natatada pang miembro kan Rabe Criminal Gang Group na magsurender na sa mga otoridad asin tinawan-duon man kaini na dae sinda mapundo sa paghanap sagkod na dae sinda nagsusurender.
