LEGAZPI CITY—Matrayumpong nakapagdistribuir an Bureau of Fire Protection Region 5 nin nasa 307 na Push-to-Talk Over Cellular body-worn cameras sa mga provincial offices kaini sa rehiyon nin Bicol.
Segun ki BFP Region V Acting Regional Director Fire Senior Superintendent Achilles Santiago, sa intrevista kan Bombo Radyo Legazpi, programa ini kan Department of Interior and Local Government nganing magkaigwa nin transparency sa saindang mga inspeksyon asin magserbi man bilang proteksyon sa mga bumbero.
Dugang kaini na nakatalaan man sindang magdistribuir na kadugangang Push-To-Talk Over Cellular para sa pagresponde sa mga kasulo asin iba pang emerhensya.
Mientrastanto, pagiromdom man ni Santiago sa mga personahes kan saindang ahensya na gampanan nin tama an saindang sinumpaang mandato maski wara nin mga siring na ekipahe.
Naghihingoa man an opisyal na dae magsawa an mga fire marshall sa pagtao nin giya sa mga fire safety inspectors asin ingatan an saindang mga bumbero na nakadesignar sa rescue operations, emergency and medical response, asin firefighting operations.
Abiso man kaini sa publiko na pwedesir bisitahon an saindang social media account mapadapit sa pagheras nin fire safety tips nganing maibitaran an anumang mapandestrosong mga insidente nin kasulo.
