LEGAZPI CITY- Swerteng warang pigsapar na lugad an pulis sa syudad kan Legazpi makalihis kaining makasagupa asin paputukan pa nin badil kan sarong holdaper.
Sa intrevista kan Bombo Radyo Legazpi ki P/Supt. Nilo Berdin, hepe kan Legazpi City Police, napag-araman na nagabantay sa Rizal St., corner F. Imperial St kan City si PO3 Regie Viñas kan makua an saiyang atensyon kan sarong kahina-hinalang tawo na nakatindog harani sa food frachise nin doughnut.
Naglakaw pasiring sa direksyon kan Rotonda Quezon Ave an lalaking nakasulot nin itom na jacket asin backpack kaya sinundan ini ni Viñas alagad kan marisa an pulis, tulos ining nagdulag sa direksyon kan Magallanes St.
Sa puntong ini nagdalagan na man an pulis alagad pinara kan suspek an paparaning tricycle driver sabay tutok nin badil sa driver na nabistong si Sandy Bacay, 47-anyos.
Antes pa man maghali an behikulo, pinaputukan kaini nin duwang beses an pulis alagad dae na nag-retaliate pa si Viñas sa pagkahandal na tamaan an driver asin an lunad kaining babaying pasahero.
Sa testimonya kan mismong driver, nagpababa suboot ini sa gilid kan riles sa may Brgy. Oro Site kun sain nagpapadagos pa an paghahanap sa suspek kan tropa kan kapulisan.
Sa presente piglalaoman ni Berdin na maibubuyagyag kan CCTV footage sa kataid na establishimento an pagkakabisto kan suspek para sa madalian na pagkaka arestar digdi.
