LEGAZPI CITY – Nakaguno nin manlain-laing sentimyento gikan sa mga paratukdo sa provincia kan Albay mapadapit sa ipapa-otob na trimester system para sa school year 2026-2027.
Magigirumduman na pig-aadalan ini kan Department of Education (DepEd) bilang parte kan sarong “holistic approach” para sa mga estudyante kun sain babangaon an 201 na school days sa tolong term kun saen an enot na term an poon Hunyo sagkod Setyembre; ikaduwang term sa Setyembre sagkod Disyembre; asin an ikatolong term sa Enero sagkod Marso.
Segun ki Albay Schools Division Office Spokesperson Froilan Tena sa intrevista kan Bombo Radyo Legazpi na bago pa man ini magluwas an nagsagibo na an ahensya nin konsultasyon sa manlain-laing sektor nganing hilingon kun maisasakatupadan an naunambitang lakdang.
Alagad kun siya suboot an hahaputon bilang sarong paratukdo, dakulang adjustment an saindang gigibuhon enkaso i-implementar na an trimester system sa saindang school calendar arug kan pagbanga kan mga major subjects sa kada semester siring man an grading system.
Sa hiling niya man an dapat maghire nin kadugangang personnel nganing maggibo sana nin administrative task nganing makapag-focus sana an mga paratukdo sa saindang pagtutukdo sa mga estudyante.
Pagdoon pa ni Tena na dae kakayanon kan mga paratukdo sa provincia kan Albay enkaso i-implementar na tulos an trimester system sa school year 2026-2027 kun kaya dapat ining pag-adalan nin maray sa halangkaw asin hababang kapulungan nganing maaprubahan antes ini ipa-otob.
