LEGAZPI CITY-Buminagsak an presyo kan krudo sa pankinabang merkado makalihis na ianunsyo kan Iran na “completely open” na an Strait of Hormuz sa mga commercials ships na nag-aagi digdi.
Susog sa mga report, buminaba sa humigit-kumulang $88 kada bariles an Brent crude hale sa labi $98 kan Sabado (aldaw sa Pilipinas).
An Strait of Hormuz, iyo an sarong importanteng ruta na nagdadara nin haros 20% kan pankinabang langis asin liquefied natural gas.
Sinabi kan Iranian Foreign Minister Abbas Araghchi na posibleng makaagi an gabos na commercial vessels mantang nag-iiral an ceasefire sa rehiyon.
Huli digdi, naglangkaw man an mga stock market sa U.S. asin Europa kun saen uminangat an S&P 500, Nasdaq, asin Dow Jones nin hasta labi 1%, mantang an mga merkado sa Europa siring kan DAX sa Germany asin CAC sa France na naglangkaw nin labi2%.
Marurumdumang nagkaigwa nin paglangkaw sa presyo nin langis kan mga nakalihis na semana huli sa tensyon sa pagultanan kan Iran asin Israel, kun saen uminabot pa sa labi $100 kada bariles asin minsang luminagpas pa sa $119.
Sa tahaw kan pagbubukas kan ruta, nagtetenir na maingat an nagkapirang shipping companies asin sinabing mahalat muna sinda bago mag-agi sa nasambitang lugar huli sa isyu kan seguridad.
Mientras tanto, nagkapirang analyst an nagsabing posibleng magkaigwa nin pabago-bago an presyo kan langis mantang bako pa ganap na stable an sitwasyon sa rehiyon.
