LEGAZPI CITY—Pighayag kan election watchdog na ‘Kontra Daya’ na dae mapupundo an premature campaigning kun warang masasampulan na mga darakulang kandidato o opisyal na may mga kapangyarihan o impluwensiya sa nasyon.
Segun ki Kontra Daya Convenor Danilo Arao, sa intrevista kan Bombo Radyo Legazpi, na wara man na mangyayari sa election system kun papabayaan sana kan Commission on Elections (COMELEC) an siring na sitwasyon.
Dugang kaini na dae nasusunod an pigpaotob kan Comelec sa pagbabawal sa pagbugtak nin campaign materials sa mga asistensya kan gobyerno huli ta bago pa man naipaotob an budget, padagos na suboot an pagdistribuir kan mga nagkapirang kandidato nin tabang o ayuda sa mga Pilipino, kun saen piggagagamit na an rekurso kan gobyerno para makakua nin mga boto sa papaabuton na eleksyon.
Pangapudan kaini sa Comelec na dae na paghalaton na may magsunad nin reklamo huli ta may mga ebidensya man na mahihiling asin makukua sa mga secondary source siring kan media.
Tinawan-doon man kaini na dae man boot-sabihon kakasuhan tulos sinda, alagad pwedesir man na ipaapod o i-call out publicly an mga kandidato para ieksplikar an saindang pamomolitika.
Dugang pa digdi na an pre-mature campaigning dapat dae nangyayari huli ta wara man ini sa ley, alagad nangyayari man giraray ini siring na sana an pagpaskil nin mga billboards asin poster maski na warang nakabugtak na dapat sindang iboto—yaon man giraray an mensahe o kaisipan na dapat iboto an sarong politiko.
Ipig-eksplikar man kan opisyal na dapat dae sana paghilingon kan Comelec an literal na mensahe kan mga billboards huli ta may ipigtao pa ining ibang ibig-sabihon o an pig-aapod na “underlying subtexts” o “implied message.”
Segun ki Arao, kaipuhan na may masampulan na darakulang kandidato o opisyal huli ta sinda an may makukusog na boot na gamiton an saindang posisyon para magkaigwa nin advantage kumpara sa saindang mga oposisyon.
