LEGAZPI CITY-Pigbuyagyag ni Colonel Manaros Boransing II sa Impeachment Court na pigkakarkulong P30,000 hasta P60,000 an ginastos kan Philippine Army sa kada walong Youth Leadership Summit (YLS) na ginibo kaini.
Nabuyagyag an detalyeng ini makalihis na haputon siya ni Senador-judge Bam Aquino madapit sa average budget na itinagama kan Armed Forces of the Philippines (AFP) para sa siring na mga programa.
Paliwanag ni Boransing, nakadepende an kantidad sa pangangaipo kan nasabing aktibidad, na maabot sa P60,000 an nagastos sa Lanao del Sur mantang P30,000 an pigtagama sa ibang lugar.
Tinawang-duon kan opisyal na an mga aktibidad na ini an karaniwang pig-oorganisar kan mga infantry battalions na nagsusumitir nin opisyal na kahagadan para sa kagamitan asin suporta.
Huli kaini, pigkakarkulo ni Sen. Aquino na dai naglagpas sa P500,000 an kabilugang nagastos kan militar para sa walong YLS.
Piglinaw ni Boransing na an nasambit na pondo, enot na nakatagama sa koordinasyon sa irarom kan representation account codes.
Hinapot man ni Sen.Aquino an reaksyon kan opisyal manungod sa mga nagluluwas na report na uminabot sa P15 milyones an nairekord na gastos para sa pagtipon nin impormasyon, surveillance, asin security services.
Alagad, nagsayuma si Boransing na magtao kan saiyang personal na opinyon sa bagay na ini.
Sinabi pa kan opisyal na bilang sarong aktibong miyembro kan AFP, bakong maninigo na magtao siya nin komento sa sarong bagay na pulitikal urog na nagpapadagos pa an paglilitis asin wara pa nin pinal na desisyon an Commission on Audit (COA).
Sa ibong na lado, nasabutan man ni Sen. Aquino an sitwasyon kan testigo asin inasegurar kaini na tatawan siya nin leeway sa paghapot bilang respeto sa saiyang padagos na serbisyo sa banwaan.
