LEGAZPI CITY-Binatikos ni Senator-Judge Raffy Tulfo si Impeachment Court Spokesperson Atty. Regie Tongol huli sa suboot pangengenot kaini sa pag-anunsyo nin timetable manungod sa pinal na hatol kan korte sa impeachment case kontra ki Vice President Sara Duterte.
Durante kan paglilitis ngonian na aldaw nin Lunes, pigkwestyon ni Tulfo an naenot na pahayag ni Tongol na posibleng magkaigwa nin final verdict sa kaso sa Disyembre 16.
Segun ki Tulfo, an pahayag nagmukna nin impresyon sa publiko na an Impeachment Court nagdesisyon na kun ano an resulta kan paglilitis.
Sinambit ni Tulfo na nagkapirang mga kamidbid asin amigo niya an nag-apod saiya nganing maghapot kun nadeterminaran na an resulta kan kaso nin impeachment.
Piglinaw man ni Presiding Officer Chiz Escudero na bakong tama an pahayag manungod sa sarong hatol kan Disyembre 16.
Ipinaliwanag ni Escudero na an timetable nakabase sana sa mga kalkulasyon na hale sa pre-trial order, kun saen an prosekusyon naghagad nin 61 o 62 na aldaw nin paglilitis asin an depensa naghagad nin 30 aldaw.
Ipig-doon niya na an kalkulasyon nakabase sa matematika asin sa kalendaryo, imbes na sa aktuwal na pag-dalagan kan paglilitis, orog na igwang nagkapirang pagdangog an kinansela.
Huli kaini, hinagad ni Tulfo ki Escudero na ipagirumdom ki Tongol, na sinasabi na bako ini an enot na pagkakataon na an tagapagtaram nagpaluwas nin pahayag sa media antes pa man nagkaigwa nin kasunduan an mga senador-judges sa bagay na ini.
Sinabi ni Tulfo na an mga senador-judges, naeenotan suboot sa impormasyong pigpapaluwas sa media manungod sa paglilitis.
Inasegurar man ni Escudero na tatawan niya nin konsiderasyon an pahayag ni Tulfo asin tatawan nin aksyon an bagay na ini.
