LEGAZPI CITY-Tinugotan kan Senate impeachment court an House prosecution panel na magpresentar nin mga summary asin tables na pigandam kan saindang witness gikan sa Bureau of Internal Revenue (BIR) sa pagpapadagos kan impeachment trial ni Bise Presidente Sara Duterte kan suudma, aldaw nin Huwebes, Oktubre 8.
Alagad, temporaryong ipinagbabawal ni Presiding Officer asin Senador-Judge Francis “Chiz” Escudero an pagpresentar kan actual source documents o orihinal na BIR records na may laog na tax records ni VP Sara asin kan saiyang esposo na si Atty. Manases “Mans” Carpio.
Nagpatanid si Escudero sa pribadong piskal na si Atty. Erwin Matib na maghagad nguna nin permiso sa korte antes magpresentar nin anuman na source document.
Susog sa Presiding Officer, pwedeng ipresentar an mga summarie asin asin mga tables na hale sa mga dokumentong kinua hale sa mga dokumentong isinairarom sa subpoena, basta an mga kopya ipapanao man sa mga partido asin sa mga senador-judges.
Tinawang-duon man ni Escudero na suhay na bagay an pagpresentar kan orihinal na record kan BIR, partikularmente madapit sa mga dokumento na sakop kan presidential letter na nag-otorisa kan saindang pagsumiter sa impeachment court.
Antes an desisyon, nabanggit ni Escudero an impeachment trial ni dating Chief Justice Renato Corona, kun saen an nagtestigo si BIR Commissioner na si Kim Jacinto-Henares manungod sa tax records asin Statement of Assets, Liabilities, and Net Worth (SALN) ni Corona.
Segun ki Escudero, wara man nin aktuwal na tax returns o iba pang dokumento an ipigpresentar mantang nagtetestigo an witness, mantang tinugutan an media na makalaog nganing mag-cover kan proceedings.
Mientras tanto, pinuna man ini ni Senator-judge Pia Cayetano an pagpapahiling sa screen kan sarong dokumento hale sa BIR mantang pighahalat pa kan impeachment court an desisyon kun posible ining ipahiling sa publiko.
“This was an issue! Tapos dinisplay ng, what? 20 seconds? 30 seconds?” sinabi Cayetano.
Sinabi naman ni Presiding Officer Chiz Escudero na tulos ining hinale sa screen an table of summary.
