LEGAZPI CITY-Nanindugan si Senador Francis “Kiko” Pangilinan na dapat na irekord asin ipaliwanag sa publiko kun haen an kada pondo na itinagama kan gobierno para sa flood-control projects sa nacion.
Kasabay ini kan pangapodan ni Pangilinan para sa sarong komprehensibong plano sa national flood management, huli ta an mga parte kan Metro Manila asin pagtaraid na probinsya, padagos na nakakaeksperyensya nin pagbaha huli sa pinakusog na habagat.
Segun ki Pangilinan, bakong bastante na maaraman sana kun pira an pig-alokar para sa flood control, kundi dapat malinaw kun anong mga proyekto an napondohan, kun saen ini ipinaotob, kun gurano an nagastos, kun sisay an mga kontratista, kun ano an estado kan implementasyon asin kun epektibo an mga ini.
Pigduon kan senador na dai dapat matapos sa mga proyekto na nasa papel sana an pondo na itinagama ngani maprotehiran an mga komunidad laban sa pagbaha.
Dapat suboot mahiling an aktwal na resulta kan mga proyekto sa mga lugar na pigseserbihan kaini.
Ginibo ni Pangilinan an pangapudan mantang padagos na nakakaapektar an pagbaha sa klase, trabaho, negosyo asin transportasyon sa nagkapirang lugar sa nacion.
Sinabi man kan senador na kinakaipuhan an sarong long-term asin coherent flood management plan sa bilog na nasyon ngani na dae sana maglaom an gobierno sa emergency response kada igwang makukusog na pag-uuran.
Dugang pa ni Pangilinan, dapat preventive, science-based asin transparent an national flood management plan, mantang kinokonsiderar man an epekto kan climate change asin iba pang concerns sa kapalibutan.
