LEGAZPI CITY-Nagtutubod an sarong Political Analyst na dai makakaapektar sa pagbagsak kan gobierno an nagin pahayag ni Sen. Imee Marcos laban kay President BongBong Marcos Jr..
Segun kay Bicol University-Political Science Department and Far Eastern University Prof. Amr Solon Sison, sa intrevista kan Bombo Radyo Legazpi na nagseserbing taktika na ini kan politika sa pilipinas kun sain nagkakaigwa nin paglihis sa pokus sa problema kan gobierno.
Alagad, an dai suboot ini nangangahulugang matatanggal sa puwesto an Presidente o magbagsak an gobierno.
Paliwanag pa kan Political Analyst na matatanggal sana an sarong Presidente kun dai niya ma-dedeliver nin maayos an saiyang mga plataporma asin serbisyo.
Sinabi pa niya na dai dapat ma-filter kaini an mga problema kan nacion orog na sa kurapsyon, pagkamit kan hustisya asin an pag-correct sa mismong isyu.
Posible man suboot ining magkaigwa nin epekto sa maabot na eleksyon orog na nagpopoon nang magduda an mga namamanwaan sa Presidente.
Dapat man suboot na pigtututukan sa ngonian an pagkakaigwa nin pokus sa solusyon sa isyu kan kurapsyon.
Laoman man niya na dai kaini matabunan an pigsasagibong imbestigasyon kan Independent Commission for Infrastructure asin kan Senado siring man an pinaka problema kan nacion sa kurapsyon.
