LEGAZPI CITY – Dae maikokonsidera kan sarong political analyst na makakatabang sa pag-prosecute kan mga pulitikong imbwelto sa korapsyon an mga rebelasyon ni Former Congressman Zaldy Co.
Segun ki Atty. Michael Henry Yusingco sa intrevista kan Bombo Radyo Legazpi na maski nagtaram na si Co an wara man giraray ining magiginibo sa kamawotan kan ordinaryong Pilipino na mapakulong an mga tiwaling opisyal asin mabawi an mga kwartang hinabon.
Pigkakahandal niya man an pagigin close ni Ombudsman Jesus Crispin “Boying” Remulla sa presenteng administrasyon sa saiyang pigsasagibong imbestigasyon man urog na ngonian na inagyat ini ni Co na imbestigaran magin si Presidente Ferdinand Marcos Jr.
Pagdoon niya man maski na imbestigaran kan Ombudsman si PBBM an dae man giraray ini makakasuhan huli sa saiyang immunity alagad bako ibig sabihon suboot na dae ini pwedesir imbestigaran kun imbwelto ini sa nangyaring katiwalian.
Nahihiling man kan nasambitang political analyst na pulitika an nasa likod kan saiyang paglitaw liwat huli ta mawot niya sanang maribok an presenteng political system kan Pilipinas urog na garing vlog sana an video kan saiyang mga rebelasyon.
Huli man suboot sa mga nangyayaring bangayan sa pulitika an dae nakakatukaw an mga maray asin matitinong lideres huli ta natatakluban an saindang tunay na obheto asin namamayagpag an mga political dynasties na nakikipagbardagulan sa presente.
Nasasabotan niya man an mga wala-toong nangyayaring hiro protesta kan publiko huli ta digdi ninda naipapahiling an saindang sobrang dagit urog na kun nakakamate na sinda nin labing pagtios asin rinapado kan mga kalamidad asin nahihiling ninda an marangyang buhay kan mga pamilya kan corrupt na pulitiko sa social media.
Nagtutubod man si Yusingco na malabog na an timing kan patanid ni Presidente Marcos na may makukulong ng tiwaling opisyal antes magsapit an kapapaskuhan huli ta iba an nakasaad sa konstitusyon na dapat sunudon kan mga nasa gobierno.
