LEGAZPI CITY—Nakumpiskar kan mga otoridad an maabot sa P300,000 na kantidad nin pinagtutubudang shabu sa Barangay Dap-dap, sa ciudad nin Legazpi sa probinsya kan Albay.
Segun ki Legazpi City Police Station spokesperson Police Executive Master Sergeant Carlos Paña sa intrevista kan Bombo Radyo Legazpi, sa saindang ginibong drug-buy bust operation sa nasambit na lugar; duwa kuta an saindang target na arestaron kun saen nakipagtransaksyon an nakasibilyan na pulis sa mga suspetsado, alagad kan nariparo kan saro sa mga ini na an saindang katransaksyon sarong pulis, tulos ining tuminakas sa lugar.
Kaya saro sana an saindang naarestar asin digdi nakumpiskar an pitong heat transparent sachet na pinagtutubudang shabu na may gabat na 50 gramos.
Mientrastanto, an suspetsado posibleng mahampang sa kasong pagbalgar sa Section 5 asin Section 11 kan Republic Act 9165 o an Comprehensive Dangerous Drugs Act of 2002.
Pangapodan man kan opisyal sa publiko na dae na maggamit nin ilegal na droga huli ta nakakaraot ini nin futuro asin buhay kan sarong indibidwal.
