LEGAZPI CITY — Nagpagirumdom an hepe kan Legazpi City Police sa publiko kontra sa mga modus o budol-budol.
Segun ki Pol. Supt. Nilo Berdin Jr kan hepatura, nakapagrehistro na nin ikaduwang kaso nin modus sa mga tindera kun saen ngonian, biktima an tindera nin bunay.
Segun ki Berdin, ipigwalat kan paratienda an pwesto sa sarong menor de edad ngani na mag-iba sa buyer na mabakal nin 12 tray nin bunay.
Alagad kan makahali na, may nagdulok sa aki asin pighagad suboot an money bag kan tindera na itinao man kan aki.
Sinabi ni Berdin na enot naman ining nangyari sa paratienda man nin kamote.
Afuera sa nasabing modus, igwa man nin insidente na ginamit an pangaran kan hepe ngani na maghagad nin cellphone load.
Kun kaya abiso ni Berdin sa publiko na maglikay na makipaghuron sa mga dae kabistong tawo ngani na dae mabudol-budol o kaya maging alerto sa mga sitwasyon.
