LEGAZPI CITY — Nangapudan an hepe kan Polangui Municipal Police Station sa Department of Public Works and Highways (DPWH) na tapuson na an mga piggigibong proyekto sa banwaan na nagiging causa suboot kan kadaklan na aksidente sa tinampo.
Segun ki P/Maj. Ed Azotea sa intrevista kan Bombo Radyo Legazpi, nagigin causa kan aksidente an mga dae pa tapos na proyekto kan DPWH siring kan road widening.
Problema man suboot an mga highway na kulang sa precautionary safety measures siring kan traffic signages na makakatabang sa mga driver.
Ipinaabot naman kan hepe sa lokal na gobierno kan Polangui an pangapodan asin tulong beses nang nagsurat sa ahensya.
Abiso pa ni Azotea sa mga motorista na mag-ingat sa pag-agi sa Maharlika Highway, sundon an speed limit asin irespeto an tinampo asin mga kapwa driver.
An nasabing pahayag kan hepe an kasunod kan nangyaring banggaan kan tricycle asin kotse sa Maharlika Highway sa Barangay Balangibang kun sain nagadan an driver kan tricyle na si Ricardo Ergueza asin an mga pasaherong sinda Lorna Bermido asin Victoria Bermido.
Nasa maray naman na kamugtakan an menor de edad na pasahero.
Segun pa ki Azotea, maski naisangat na an kaso kontra sa driver kan kotse na si Nemesio Millena, nauli man sana sa areglo an insidente.
