LEGAZPI CITY- Aminado an Condor Piston Bicol na nagkaigwa nin pagkalibong an nagkapirang mga drivers huli sa biglaan napagkanselar kan Manibela national sa saindang tigil-pasada.
Segun ki Condor Piston Bicol President Ramon Rescovilla sa intrevista kan Bombo Radyo Legazpi na na an Manibela national an enot na nagmawot na magkasar kan transport strike alagad biglaan na nagkanselar makalihis na makaolay an Department of Transportation.
Huli digdi, nadisganar an Piston Bicol sa suboot kawaran nin paninindugan kan lider kan nasabing transport group.
Sa ibong kaini, sinabi ni Rescovilla na padagos an saindang maninindugan sa ipinaglalaban na pagpapababa kan presyo kan produktong petrolyo asin pagpapalangkaw kan ganansya kan mga namamanwaan.
Katakod kaini, naghagad man nin dispensa an opisyal sa publiko huli ta bako suboot intensyon na pasakitan an mga ini, kundi mawot sana na madangog kan gobierno an saindang mga pangapudan sa tahaw kan halangkaw na presyo kan langis.
