LEGAZPI CITY – Nagpapasalamat an mga opisyales kan Barangay Buyoan, Legazpi City sa Department of the Interior and Local Government (DILG) huli sa pagpapa-otob kan Anti-Epal policy.
Segun ki Punong Barangay Ronaldo Miña sa intrervista kan Bombo Radyo Legazpi na makakatabang an kasuguan nganing maibitaran an pagkakaigwa nin impluwensya kan mga opisyales kan Gobierno, mapa-barangay man, local o national level sa mga proyektong pinondohan kan buwis kan namamanwaan.
Punto niya na an mandato kan mga opisyales kan Gobierno an magpa-implementar sa ipapatugdok na mga imprastraktura asin programa na makakatabang sa saindang nasasakupan alagad dae pwedesir na ibugtak an saindang pangaran, ladawan, logo, slogan, asin anuman na simbolo afuera suboot kun hale an pondo sa saindang sadiring bulsa.
Maserbi man an polisiya sa mga maralaog sa kinaban kan pulitika bilang patanid asin matawan nin patas na pagpili an mga botante sa mga indibidwal na mawot nindang i-elihir sa pwesto.
Paglilinaw man kan opisyal na dae ninda tatanggalon an mga dati nang nakabugtak na mga pangaran asin ladawan kan mga pulitiko sa mga imprastrakturang nakatugdok sa saindang Barangay asin ipapaubaya na sa DILG an paggibo nin magkakanigong lakdang dapit digdi.
Nagpasalamat man si Miña ki Interior Secretary Jonvic Remulla sa pagsugo sa gabos na lokal na gobyerno na ipa-otob an polisiya na makakatabang sa komunidad.
 for the implementation of the Anti-Epal policy.){kind=link}