LEGAZPI CITY-Ipighayag kan Cybercrime Investigation and Coordinating Center (CICC) na saindang pigbabantayan ngonian an panibagong modus o paagi kan mga hackers ngani makapambiktima.
Segun kay Undersecretary Renato ‘Aboy’ Paraiso an Acting Executive Director kan nasabing ahensya na bago matapos an taon, saindang pigbabantayan an paglaog sa nacion kan mga pigpapabakal na ‘malicous cables’.
An mga kable suboot an gari ordinaryong charging cable sana alagad saro ining paagi kan mga hackers ngani makalaog an virus sa sarong device.
Kun kaya nakamonitor suboot sinda sa mga siring na klase kan kable ngani madakop an mga nasa likod kaini asin an nagpapakalat kan virus ngani makontrol an cellphone kan mabibiktima.
Pigbabantayan man kan ahensya magin an pigaapod na Radio Frequency Identification o RFID devices.
Saro man ining sistema kun sain dai na kinakaipuhan makuwa an smartphone kundi dudukutan ini asin mahahabon na an kwarta hale sa mga e-wallets kan biktima.
