LEGAZPI CITY – Ipigdoon kan tagapagtaram kan Legazpi City Schools Division Office na magayon na paagi an pigbibilog na proper dresscode kan Department of Education mapadapit sa mga bagong set nin uniform.
Segun ki Santi Araña sa intrevista kan Bombo Radyo Legazpi na magayon an lakdang na magkaigwa nin bagong uniform arug kan mga Barong asin Filipiniana an mga paratukdo nganing maipahiling an saindang pagka-makabayan nin huli ta susuluton ninda ini sarong bes sa sarong semana nindang paglaog sa mga eskwelahan.
Dae man suboot masasayang an mga bagong set nin uniporme kan mga paratukdo nin huli ta natatawan ninda nin respeto asin naipapahiling an nasyonalismo sa pagsulog kan mga ini.
Pigtaram pa kaini na wara pa man na mga paratukdo asin eskwelahan sa bilog na syudad kan legazpi an nag-iimplementar asin nagsusulog kan mga bagong proper dress code.
Piglinaw man kan opisyal na pigtawan an DepEd nin anom na bulan nganing magkrear asin magpaluwas nin guidelines mapadapit sa kasuguan na proper dress code kan mga paratukdo.
Pig-aadalan na kan binilog kan DepEd central office na uniform comitee nganing maaraman an uniform na gagamiton kada aldaw o kada enot na lunes kan bulan.
Se presente, nagtetenir na pigsusulog an mga dating uniform hanggat wara pang pigpapaluwas na bagong internal guidelines.
Abiso ni Araña sa mga paratukdo na maghalat na sana sa resulta kan pag-aadal kan central office nganing maaraman na kun anong klase nin uniform an saindang susuluton.
