LEGAZPI CITY- Tutok man liwat an atensyon kan Philippine Volcanolgy and Seismology (Phivolcs) sa anumang abnormal na aktibidad na naoobserbahan sa Bulkang Bulusan sa probinsya kan Sorsogon.
Base sa latest seismic monitoring kan Phivolcs, nakapagrehistro na naman kan halangkaw na bilang kan mga pagyugo sa palibot kaini na nag-abot sa 16 na volcanic quakes.
Nadidifisilan man an ahensya na maobserbahan an pinakabunganga kan bulkan huli naman sa mahibog na panganoron na nakatakop sa tuktok kaini.
Mientrastanto, nagbaba man an volume kan asupre na pigbubuga kan bulkan kun saen 37 tonelada kada aldaw an average sulfur dioxide (SO2) emission kaini kan Enero 5.
Naka-alerto man an mga residente na harane sa bulkan urog na’t mantenido an Alert Level 1 status digdi.
Pirang semana man na naging kalmado an nasabing bulakn sa presenteng lebel alagad mistulang liwat nagimata makalihis an pirang aldaw namang paglangkaw kan mga naoobserbahang pagyugo.
