LEGAZPI CITY – Padagos an mga pigsasagibong intervention kan nganing mamantenir an pagigin mentally stable kan saindang hanay.
Segun ki Philippine Army 9th Infantry Division (9ID) Spokesperson MAJ Frank Roldan sa intrevista kan Bombo Radyo Legazpi na dakol sindang programa nganing mapangatamanan an mental health sa paagi kan mga aktibidad na makakatabang nganing magin stable asin dae mauli sa bako magayon an mga suldados na nakakamati nin mental stress.
Numero uno man nindang prayoridad an pagigin mentally stable kan mga kasuldaduhan nganing makatabang an mga ini sa pagtatao nin serbisyo sa nacion na warang pig-iisip na problema.
Nahiling niya man na naghalangkaw an numero kan mga suldados na nagsasapar sa mental stress makalihis an Covid 19 asin saro suboot sa mga rason kaini iyo an labing pagbabad sa social media.
Aminado man an opisyal na kalimitang may pigagibong maraot an mga tawong maluya an mental capacity, mapa-kasuldaduhan man o mga normal na sibilyan.
Huli digdi, pigtuturo ninda sa saindang tropa na likayan an labing pagbabad sa social media asin dakulan an personal na interaksyon sa pamilya asin mga amigo nganing mapatibay pa an saindang mental toughness.
Sa ibong kaini, pigsyerto niya man an 100% na magigin matatag an kasulduhan na saindang ipig-deploy sa mga area sa rehiyon nganing magpa-otob nin matuninong asin salbado na pirilian.
Pangapodan kaini sa publiko partikulamente sa mga kasuldadohan na may pig-aagihan sa buhay na dae magpadaog sa saindang emosyon asin maghanap nin makaka-olay nganing mapagaan an saindang pig-iisip.
