LEGAZPI CITY-Magtetenir na nasa offensive mode ngonian na holiday season an Philippine Army 9th Infantry Division sa kan deklarasyon kan CPP-NPA’s ceasefire.
Segun ki Philippine Army Chief of the 9th Infantry Division Public Affairs Office Major Frank Roldan, sa intrevista kan Bombo Radyo Legazpi na magtetenir sinda na nasa offensive mode ngonian na holiday season orog na anibersaryo kan Communist Party of the Philippines (CPP) sa maabot na Disyembre 26.
Nagsasagibo man sinda nin pratikal na opensiba kun kaya dai ninda pigtutugutan ini huli sakadakol na mga operasyon.
Sa ngonian, nakapokus an bilog na dibisyon sa mga military operation katuwang an intelligence community asin sa koordinasyon kan kumunidad manungod sa pagpapaabot nin mga impormasyon mapadapit sa mga armadong NPA sa rehiyon.
Nakadeploy na man sa kanya-kanyang area of responsibility an saindang tropa kaiba an saindang batallion asin tulong brigade para sa mas makusog na pwersa.
Kun babalikan, nagkaigwa nin encounter sinda sa panahon kan kapaskuhan sa parte kan Masbate.
Dagdap pa kan opisyal na nasa 50 encounter an nairehistro ngonian na taon kun sain dakulang tabang an taumbayan sa pagtatao nin mga report siring man an paggamit kan teknolohiya.
Piglalaoman man na magin matoninong an pagselebar kan pasko asin bagong taon.
Mientrastanto, segun kay Major Roldan bako man suboot sinda tugot sa ceasefire kan Communist Party of the Philippines (CPP) and New People’s Army (NPA), huli sa gagamiton sana an mga ini sa pagorganisa kan saindang puwers sa mga lugar na dati na nindang pigduduman, siring man an katakod kaining peligro liwat sa dati na nindang pig-violate an mga nakalihis na ceasefire, kun kaya bako sinda ‘credible’ ngani maghagad kaini sa gobierno.
