LEGAZPI CITY – Nagtao nin teorya an sarong peace studies professor sa kun papano masusulusyunan an nangyayaring hiro protesta sa Pilipinas katakod kan mga korapsyon asin anomalya sa flood control projects.
Segun ki Bicol University Peace Studies Professor Dr. Herbert Rosana sa intrevista kan Bombo Radyo Legazpi na saro sa mga ini iyo an dapat pakonsensyahon an mga tiwaling tawo nganing masabutan kaini an agrangay kan namamanwaan asin maggibo nin sulusyon dapit digdi.
Nakakatabang man suboot an mga protesta huli ta nganing mailuwas kan publiko an saindang setemyento asin madangog man kan gobierno an saindang kahagadan huli ta apektado sinda kun kaya ninda ini pigsasagibo.
Pagdoon niya man na dae dapat pagtanggalon an direchos kan mga pilipino na mag-hiro protesta huli ta ini an saindang paagi nganing mag-interact sa gobierno.
Pigtaram pa kan propesor na dapat man na mapugulan na magsobra an mga protester nganing dae man ini mag-abot sa pisikalan huli ta wara man ki makukuwa na magayon na resulta kun magpapadara sa dagit asin sobrang emosyon.
Alagad kun pagbabasehan suboot an ley, pwedesir na mapanimbag an protester urog na kun nakadestroso ini nin private property o nakakulog nin ibang tawo.
Pwedesir man na na-inspire an ibang protesters kan nangyari sa Indonesia kun kaya posibleng magpukaw nin atensyon kan ibang tawo an mga hiro protesta na malaag man nin peligro sa Pilipinas.
Pighayag pa ni Rosana na dapat masubaybayan kan gobierno an mga protesta nganing tulos ining matawan nin magkakanigong sulusyon.
