LEGAZPI CITY – Pigsyerto kan Philippine Drug Enforcement Agency (PDEA) Bicol na dae makakapagtago habangbuhay an mga wanted mapadapit sa ilegal na droga.
Segun ki PDEA Bicol Spokesperson Carlo Fernandez sa intrevista kan Bombo Radyo Legazpi na padagos an saindang operasyon na ipigkondusir sa manlain-laing parte kan rehiyon nganing mahanap asin madakop an mga nagtatarago sa ley.
Bako lang an saindang ahensya an kalaban kan mga imbwelto sa ilegal na droga nin huli ta nakikipagtabangan na ngunyan na panahon an mga komunidad asin mga barangay sa saindang opisina.
Dae man ninda pigluluwas an impormasyon kan mga nagtataram sainda na mga concerned citizen nganing maprotehiran an mga ini asin nganing dae mabalikan kan saindang mga pigsumbong.
Pigtaram man ni Fernandez na padagos an saindang pakikipagtabangan sa mga local government unit nganing magsagibo nin information campaign sa mga komunidad nganing mairayo sa peligro kan ilegal na droga an publiko.
Pigpapakusog man ninda an saindang kampanya sa paagi kan pakikipag-partnership sa ibang ahensya partikular na sa Bureau of Customs asin mga pantalan nganing maibitaran an paglaog kan ilegal na droga sa rehiyon lalo na sa mga naideklara nang Drug Cleared City asin Municipality.
Nababawasan asin nagluluya man suboot an supply kan droga sa rehiyon nin huli ta nagkakadarakop ninda an mga nagdadarakulang supplier kan mga ini mantang nagtetenir na bukas an saindang opisina para sa mga mawot magsurrender na mga drug personality nganing matawan sinda tulos nin tyansa nganing mabalik sa matanos an saindang mga buhay.
Pigpromesa man kan opisyal sa publiko na syesyertuhon ninda an kaligtasan asin impormasyon kan saindang mga informant nganing dae matakot an iba na ipagpaaram sainda an mga tawong imbwelto sa paggamit o pagpapabakal nin ilegal na droga sa enterong rehiyon.
