LEGAZPI CITY- Kinontra kan representante kan Komisyon ng Wikang Filipino (KWF) an ipigpo-porponir ni Senate President Vicente Sotto III na ribayan an hudyan na linya ng kan national anthem kan Pilipinas.
Sa intrevista kan Bombo Radyo Legazpi ki KWF Commissioner asin Kinatawan ng Wikang Bicol Abdon Balde Jr., garing insulto suboot sa orihinal na nagkrear kan mga liriko asin “creative work” ni Jose Palma an lakdang ni Sotto.
Pag-eksplikar ni Balde na pagpapahiling ini kan hibabang paghiling kan senador sa tawong nagsakit sa paggibo kan “Lupang Hinirang” urog na pigmimirar kan nasabing lyrics an sakripisyo kan mga kahimanwa asin pagmuklat kan isip sa paglaban sa mga conquistador.
Bako man nangangahulugan segun ki Balde na huli ta nagbago na an sitwasyon o peryodo, pwede naman na hiruon an simbolo kan nacion.
Imbes na pag-initan an kantang nagmarka na sa historia, gumibo na sana si Sotto nin sadiring anthem tanagarig mahiling an merits, maratipikahan asin hagadon an approval kan Kongreso kun makakapasar.
Dae man nakalagpas sa patutsada ni Balde an ipigpoproponir ni Senator Richard Gordon na pagdugang na kan sinag kan saldang kan aldaw sa bandera kan Pilipinas kasabay kan paghahayag na garing nasa “showbiz” an mga senador na nangangaipo nin atensyon.
