LEGAZPI CITY – Nahihiling na rason sa nangyaring pagrasay nin daga sa Barangay Kimantong, Daraga, Albay an mga pagpuputol nin kahoy sa mga kabuludang parte kan banwaan.
Segun ki Daraga Public Safety Office PIO Lorenzo Bañas sa intrevista kan Bombo Radyo Legazpi na wara na suboot na pigkakapitan na mga ugat kan kahoy an mga daga sa lugar kun kaya ini naglumoy asin nagrarasay.
Pigtaram pa kaini na nakaepektar man sa insidente an warang patod na pag-uuran sa rehiyon Bikol na dara kan shearline.
Dakol pang residente sa Daraga na nakatugdok sa mga kabuludang parte an mga harong na peligroso urog na kun magpadagos pa an namamateang raot nin panahon.
Mientrastanto, pigdugang pa kan opisyal na nailipat na sa mas ligtas na lugar an mga residenteng naapektaran kan nangyaring landslide kan nakaaging aldaw.
Wara man nairehistro na nalugadan nin huli ta pwedesir suboot na nakahali na an mga residente sa saindang mga kaharongan bago pa ini marasayan nin daga.
Pigpapasalamat kaini na warang casualty sa nangyaring insidente sa ibong kan nagin pahirapan an pag-rescue sa sainda kan disaster risk reduction and management unit.
Suhestyon ni Bañas na makikoordinar na an mga opisyal kan Barangay sa gobierno lokal kan Daraga nganing matawan na nin magkakanigong sulusyon an mga insidente asin maibitaran na an mga siring kaining pangyayari.
Magserbing pagirumdom suboot ini sa mga residente kan banwaan na yaon sa mga paanan an mga harong na amay nang mag-ebakwar asin dae na paghalaton na mangyari an mga kaparehong insidente sa saindang pagrugaring.
