LEGAZPI CITY-Nagtutubod an MP Promotions CEO na si Jas Mathur na magtetenir na dakularng atraksiyon sa mga boxing fans an magigin rematch nina Manny Pacquiao asin Floyd Mayweather Jr. maski pa naurong an laban kaini sa Enero sa masunod na taon.
Segun kay Mathur, nagtutubod siyang liwat na magigin matrayumpo asin makakapag-rekord liwat an paglalaban kan duwang boxing legend huli ta uni suboot an laban na mawot mahiling kan publiko.
Sinabi ni Mathur na an rematch nina Pacquiao asin Mayweather an magigin saro sa pinakadakulang sporting events sa panahon kan streaming era.
Marurumduman na inanunsyo an rematch ngonian na taon, alagad kinuwestiyon ini kan nagkapirang boxing analyst asin fans, kun makakamit pa kaini an parehong interes na nakua kan saindang enot na laban kan taong 2015.
Sa enot na paghahampang kan duwa, nanggana si Mayweather sa paagi kan unanimous decision. Kun sain kadakol an nadismaya huli ta dai suboot nagin kasing aksyon an laban siring kan pinaglalaoman huli sa depensa ni Mayweather.
Afuera digdi, parehong nasa huring parte kan saindang karera an duwang boksingero. Sa oras kan itinakdang rematch sa Enero, haros 50-anyos na si Mayweather mantang 48 naman si Pacquiao.
Alagad, nagtutubod an MP Promotions CEO na dai magigin ulang an edad kan duwang atleta huli ta pareho suboot sindang igwang natatangi na personalidad sa kinaban kan boksing.
