LEGAZPI CITY – Nag-alokar an Department of Science and Technology (DOST) Bicol nin maabot sa poco mas o menos P30 Million sa irarom kan Innovation Fund (iFUND).
Segun ki DOST Bicol Regional Director Rommel Serrano sa intrevista kan Bombo Radyo Legazpi na an naunambitang inisyatibo an naka-alokar sa saindang Small Enterprise Technology Upgrading Program (SETUP) na pigkokonsiderang flagship program kan ahensya.
Makakatabang suboot ini sa mga negosyanteng mawot mag-upgrade kan saindang negosyo sa paagi kan pag-aprobitsar kan pondo nganing makabakal nin mga ekipahe urog nang kabale pa sa pig-alokaran nin pondo an Innovations for Filipinos Working Distantly from the Philippines (iFWD PH).
Punto niya na an naunambitang pondo an kalimitang nagdadakula kada taon huli sa nagdadakulang pangangaipuhan kan mga provincia sa rehiyon siring man an nagdadakol na mga nag-aaprobitsar kan saindang programa.
Paglilinaw man kan opisyal na an mga mawot na magin benificiaries an magsasa-irarom muna sa mga criteria arug na sana kan minimum 3 years asin rehistrado an negosyo, magpadara nin letter of intent sa regional o provincial offices kan ahensya, asin saindang hihilingon an kakayanan kan establisyemento sa paggamit kan produkto.
Ipig-orgolyo niya man na nagpapadagos an saindang pagbabarewas nin mga asistensya sa irarom kan saindang mga programa poon pa kan enot na semana kan presenteng taon kun sain nakinabang an mga micro, small, and medium enterprises.
Pig-enganyar man ni Serrano an mga saradit na negosyante na makipagtabangan na sa saindang ahensya nganing matabangan sinda na pauswagon an saindang mga negosyo.
 Bicol has allocated approximately P30 Million under the Innovation Fund (iFUND).){kind=link}