Legazpi City- Ipinaotob kan Bureau of Fire Protection sa probinsya kan Masbate an Oplan Kaluluwa 2024 para sa pagkomemorar kan paparaning Undas.
Segun kay SFO1 Alvin Dela Peña, tagapagtaram kan Masbate City Fire Station sa intrevista kan Bombo Radyo Legazpi na sa paagi kan nasabing orden, matao ini nin seguridad nganing maibitaran an kasulo sa naunambitang probinsya.
Nagsagibo na man an saindang departamento nin mahigot na inspeksyon sa mga terminal, mga pantalan, asin nagdeploy kan saindang mga personahe sa mga nagkapirang kamposanto sa probinsya.
Nagbugtak na man sinda nin first aide service team partikular na sa mandaon cemetery nganing makataong asistensya enkaso may nangyaring insidente sa mga nagbibisita.
Sa presente dae pa man nagadagsa an mga tawong nagbibisita asin piglalaoman kaini na maruso an mga tawo sa kamposanto sa probinsya pag-abot kan nobyembre uno hasta dos.
Pig-asigurar man ni Dela Peña na nakastandby an saindang departamento nganing makapagtao nin tabang sa saindang nasasakupan kun kinakaipuhan.
Pagirumdom kaini sa publiko na maali sa kanya kanya nindang kaharongan na syertuhon na nakapalsok an anumang electric appliances o anumang pwedeng magin kawsa kan kasulo asin nganing magin matuninong an pagkomemorar kan todos los santos.
