LEGAZPI CITY-Pinaghahandaan na kan mga delegado an opening kan Palarong Bicol 2026 ngonian na taon.
Mapoon an event sa oras na alas 3:00 nin pagka-hapon ngonian na aldaw, Marso 1, 2026 kun sain magkakaigwa nin parada sa grounds kan Bicol University asin maralaog an mga division offices na naka-alphabetical order.
An nasabing event, aatendiran kan mga local leaders, congressmen, governors, asin mga local executives.
Segun kay Albay Schools Division Spokesperson Froilan Tena sa intrevista kan Bombo Radyo Legazpi handang handa na an gabos para sa opening kan Palarong Bicol kun sain nasa 2,500 an delegations hale sa Albay.
Sa presente, an billeting area kan Albay nasa Daraga North Central School.
Dagdag pa ni Tena na nakakuwa sinda nin feedback hale sa mga delegado pag-abot sa venue kun sain nagin komportable ini para sa sainda.
Piglalaoman man na matapos an aktibidad sa oras na alas 6:00 pm.
Mientrastanto, nagpaabot man nin pasasalamat an opisyal sa suporta kan magurang sa mga atleta, siring man sa mga teachers, coachers asin mismo sa mga student athletes para sa nasabing event.
