Nagsaunad nin kasong perjury si Atty. Manases Carpio, agom ni Vice President Sara Duterte, kontra ki dating Senador Antonio Trillanes IV sa Pasig City Prosecutor’s Office.
An kaso an katakod kan sinumpaang salaysay na isinumite ni Trillanes sa House Committee on Justice kan Abril 22, 2026, katakod kan impeachment proceedings kontra sa bise presidente.
Sa nasabing affidavit, inakusaran ni Trillanes si Carpio asin VP Sara na igwa suboot na joint bank accounts na nagkakantidad nin labi sa P111 million kan 2016 asin sinabing igwang koneksyon sa iligal na droga.
Maduon man ining pinahimutikan ni Carpio asin inapod na malicious, pekeng akusasyon asin sarong black propaganda sana.
Pigduon ni Carpio na wara siyang bank account na nag-aabot nin P100 million asin pinahimutikan man an anuman na koneksyon sa ilegal na droga o pagresibe nin kwarta na hali sa pigtataram na drug personality na si “Sammy Uy.”
Segun sa reklamo, nagbalgar suboot si Trillanes sa Article 183 kan Revised Penal Code huli sa salang pahayag na saiyang sinumpaan sa Kamara de Representante.
Ipigduon man kan kampo ni Carpio na an mga alegasyon an basado sana sa hearsay asin warang makusog na ebidensya asin binanggit an mga enot na desisyon asin report kan Senado asin Ombudsman na nagtataram na warang bastanteng basehan an mga naenot na alegasyon kontra saiya.
