Pigsierto kan Office of the Ombudsman na preparado sindang magsimbag sa petisyon na isinangat ni dating Ako-Bicol Partylist Rep. Zaldy Co sa Korte Suprema.
Segun sa mensaheng ipinadara ni Assistant Ombudsman Mico Clavano, ibubugtak ninda an mga kontra-argumento sa petisyon sa kumento.
Sinabi niya ini makalihis na isugo kan Korte Suprema an Tanod-Bayan na itao an saindang komento manungod sa petisyon kan dating mambabatas.
Sa En Banc Session kan Korte Suprema na ginibo kan Miyerkules, Pebrero 11 ngonian na taon, pigsugo kaya an Ombudsman asin an Independent Commission for Infrastructure o ICI na magsumiter nin simbag.
Tinawan sinda nin sampulong aldaw nganing magresponde o magkomento sa petisyon na dai pa sana nahahaloy na isinangat ni dating Congressman Zaldy Co.
Afuera kan petisyon, pighagadan man sinda nin magkomento partikular sa kahagadan ni Co na magpaluwas an Korte Suprema nin T.R.O o Temporary Restraining Order.
Alagad piglinaw kan Korte Suprema na wara pa sindang ipinapaluwas na siring na orden.
Magigirumduman na nagsangat si Zaldy Co kan partikular na petisyon na Certiorari and Prohibition with Application for Writ of Preliminary Injunction and Temporary Restraining Order.
Kabali digdi an kahagadan na ibasura o ipawarang bisa kan Korte Suprema an resolusyon kan Ombudsman na makasuhan si Co nin graft asin malversation sa Sandiganbayan.
Nagtutubod kaya an dating mambabatas na igwa nin ‘grave abuse of discretion’ sa pinaluwas kaining resolusyon sa ibong kan dae pigrerekomendar kan Independent Commission for Infrastructure na isabay siya sa mga kakasuhan.
Mientrastanto, may kinaaraman pa man liwat sa dating mambabatas, ipigheras ni Ombudsman Jesus Crispin ‘Boying’ Remulla na padagos na nagpapadara nin mga pasaring si Zaldy Co.
Nanindugan siyang may mga ‘feelers’ ining ipinaabot sa ibong kan pagnegar kan sadiring abogado kan dating kongresista.
Alagad dae na suboot siya maistorya huli ta dakul an gustong makiaram sa bagay na ini.
Sa ibong kaini, pigsyerto kan Office of the Ombudsman na padagos an saindang mga lakdang sa imbestigasyon laban sa mga kurakot na indibidwal asin mga imbwelto sa korapsyon.
