Sinierto kan Department of Energy (DOE) na bastante an suplay kan langis sa nacion sa laog nin 50 aldaw.
Pinaglalaoman man an pag-abot kan dugang na mga buffer stocks ngunyan na bulan nin Abril.
Segun ki DOE Undersecretary Sandy Sales, nasa 900,000 na bariles nin langis an nakatalaan na umabot ngunyan na bulan.
Kaibanan digdi an enot na 300,000 bariles na pinaglalaoman na maabot antes an Abril 10 na hali sa Malaysia, mantang duwa pang shipment an masunod na maabot hali sa North Asia asin India.
Sinabi man ni Energy Secretary Sharon Garin na an buffer stocks an pigkukuwa sa irarom kan Emergency Energy Security Program, asin igwang bastanteng panahon an nacion ngani na magdugang nin suplay kun kinakaipuhan.
Basado sa datos kan ahensya na an presenteng suplay kan gasoline, diesel, asin iba pang produktong petrolyo an maabot hali sa 47 hasta labi sa 100 aldaw.
