LEGAZPI CITY- Padagos pa an pigsasagibong validation kan Office of Civil Defense Bicol sa duwang naireport na binawian nin buhay huli sa naging epekto kan nakalihis na panrarapado kan bagyong Enteng.
Segun kay Gremil Naz, an tagapagtaram kan Office of Civil Defense Bicol sa intrevista kan Bombo Radyo Legazpi, pigvavalidate pa kan saindang opisina kun typhoon related incident an nairehistrong pagkagadan kan duwang persona sa Naga City.
Enot kaiyan naireport an pagkagadan kan sarong 57 anyos na lalaki na suboot nakuryente sa siudad kan Naga asin nalamos man an walong bulan na aking babayi sa parehong lugar mantang may naireport man na lugadan na sarong 15 anyos na lalaki na aksidenteng napaagi sa lugar kan pinangyarihan kan pagkakuryente kan 57 anyos na biktima.
Mientrastanto, nag-abot man sa kabiluhan na 3,943 indibidwal o katumbas nin 1,009 na pamilya an nag-ebakwar sa 112 evacuation centers sa rehiyon mantang nasa 8,710 na katao o 3,382 na pamilya man an nag ebakwar sa mga kaparientes ninda o sa mga pagtaraid na harong.
Segun pa sa opisyal, nasa 290 na barangay sa Bicol an nakaeksperyensya nin pagbabaha kun saen an iba digdi an suboot dae pa naghuhupa.
Sa ngunian, pig-ingganyar kan opisyal an gabos na mga LGU na magsumitir na nin mga situational report sa saindang mga nasasakupan nganing na igwa sindang basehan antes na magtaong report sa NDRRMC.
