LEGAZPI CITY — Kinondena kan pamayuhan kan Naval Forces Southern Luzon (NAVFORSOL) an pagadan kan pinagtutubudan na miyembro kan New People’s Army (NPA) sa sarong navy personnel sa Albay.
Sa intrevista kan Bombo Radyo Legazpi kay NAVFORSOL spokesperson Ens. Jane Sasil, kakahali pa sana sa duty kan biktimang si Senior Chief Petty Officer Jesus Zaavedra na saro sa mga nagbantay sa seguridad kan BRP Davao Del Sur na nagkondusir nin Exercise Pagsisikap 2018 sa Albay.
Nag-uli suboot ini sa banwaan kan Pio Duran ngani na makaibanan an pamilya alagad bigla na sanang pinagbabadil kan pinagtutubudan na mga rebelde.
Napag-araman na nakatalaan kutang magretiro sa masunod na taon si Zaavedra makalihis an haros 30 taon sa serbisyo.
Dugang pa ni Sasil Agosto pa nakakaresibe nin death threat an biktima kaya dae ini marhay nag-uuli sa nasambit na banwaan.
Mientras tanto, segun sa opisyal, apwera sa pig-iidolo si Zaavedra kan mga enlisted personnel, respetado man ini sa Pio Duran huli sa pagbubusol kan katoninongan sa lugar.
Sa presente, pighahanda na kan NAVFORSOL an tabang na itatao sa nabayaan na pamilya kan biktima.
