LEGAZPI CITY—Katakod kan pagpuon kan School Year 2026-2027 sa Hunyo 8, opisyal nang nang inilansar kan Department of Education an Brigada Eskwela 2026 kan Lunes.
Segun ki Schools Division Office Albay Spokesperson Froilan Tena, sa intrevista kan Bombo Radyo Legazpi, nagkaigwa nin kanya-kanyang selebrasyon sa pagbubukas kan Brigada Eskwela an mga eskwelahan sa provincia kan Albay kun sain kada eskwelahan an igwa nin opening program na pig-atendiran kan barangay council magin kan alkalde.
Ipigsabay naman sa nasabing aktibidad an enrollment kan mga kajovenesan na madurar puon Hunyo 1 hasta Hunyo 5.
Pighayag man kan opisyal na komon sa mga kinakaipuhan na ayuson sa mga eskwelahan iyo an kalinigan huli man sa haros duwang bulan na bakasyon, asin partikularmente na sa mga eskwelahan sa banwaan kan Guinobatan asin Camalig na binagsakan nin abo gikan sa pag-alburoto kan bulkang Mayon.
Mientrastanto, piglalaoman man kan ahensya na maabot sa labi 200,000 na mga estudyante sa provincia an ma-enroll ngunyan na School Year 2026-2027.
