LEGAZPI CITY – Nagkaigwa nin pag-oolay an lokal na gobierno kan ciudad kan Tabaco asin mga barangay opisyal ngani na i-regulate an pagdakol kan mga paratienda sa seawall partikular na sa parte kan Barangay Kinale asin Barangay Sto. Cristo.
Sa intrevista kan Bombo Radyo Legazpi ki Tabaco City Administrator Gerardo Yad Colarina, pamientras na pinapundo an operasyon kan mga nagtitinda sa nasabing coastal sa obhetong magin organisado an lugar.
Inako ni Colarina, sa enot pinabayaan muna an mga vendor sa lugar alagad naalarma kan mag-abot na sa 80 an numero kan mga ini.
Lalo pang dae pa man ini naitu-turnover kan Department of Public Works and Highways sa lokal na gobierno kaya kinakaipuhan muna na maghagad nin clearance digdi.
Naghigot man an nasabing ahensya huli ta dae pwede sa nasabing tinampo an mga magagabat na ekipahe partikular na an mga rides na ibubugtak kuta sa lugar siring kan ferris wheel.
Ipinagbabawal man an mga behikulong warang goma an ruweda na mag-agi sa nasabing coastal roads huli ta nasa curing period pa o pigpapatagas pa an cemento.
Oras man na mabilog na an mga polisiya para sa pagigin organisado kan lugar, tulos man na ibabalik an operasyon digdi.
