LEGAZPI CITY- Dae napugulan kan sarong kapitan sa Albay na magsumbong sa mga otoridad makalihis na makaresibe nin huma hali sa suboot na miyembro kan rebeldeng grupo.
Personal na nagpasiring sa hepatura kan Rapu-rapu Municipal Police si Brgy. Kapitan Carmelita Asuncion kan Brgy. Malobago sa nasambitan na banwaan ngani na ipaabot an insidente.
Sa testimonya kaini sa mga otoridad, napag-araman na nakaresibe ini nin sarong apod asin text hali sa nagpabistong miyembro kan New People’s Army (NPA) na nanghahagad nin kwarta para sa papaabot na selebrasyon kan anibersaryo kan CPP-NPA Binamira Command sa Marso 29.
Enot na nakaresibe ini nin text message kan Marso 17 alagad kan dae ini tinawan nin atensyon, liwat ining nakaresibe nin apod kan Marso 24 hali sa parehong numero na igwa nang kaibang pagbabanta saiya kaya nagsagibo na nin lakdang an nasambitan na opisyal.
Sa presente nagpapadagos pa an ipigkokundusir na imbestigasyon kan mga otoridad dapit sa nasambitan na insidente.
