LEGAZPI CITY – Namamatian na suboot sa mga provincia sa Bicol an padiit-diit na paglaog kan mainit na panahon na ipigtatakod sa epekto kan El Niño.
Kaining Pebrero 20 kan magluwas nin El Niño advisory an PAGASA tangarig na amay suboot na makapaghanda an mga kahimanwa urog na sa matinding init na piglalaoman.
Paliwanag ni PAGASA Weather Forecaster Janice Rocero, igwa nang “dry spell” sa Catanduanes mantang “dry condition” na man an nag-iiral sa iba pang province sa rehiyon.
An “dry spell” an nangangahulugang below normal na bagsak kan uran sa tulong magkakasunod nang bulan mantang duwang bulan naman na hibaba an rainfall amount sa Albay, Masbate, Camarines Provinces asin Sorsogon.
Inasegurar man ni Rocero an dagos-dagos na pakikipagkoordinar sa mga concerned agencies sa paglalatag nin abiso urog na sa sektor nin agrikultura.
Enot nang sinabi kan PAGASA na pinakamatindi an epekto kan panahon nin tagmara sa mga bulan kan Marso hasta Mayo.
