LEGAZPI CITY – Wara pa nin plano an nagkapirang mga Pilipino sa Lebanon na magbalik sa Pilipinas sa ibong kan abiso kan Embahada na magpa-repatriate na.
Sa hampang ini kan lalong naglalalang tensyon sa nasyun huli sa balosan nin pag-atake kan mga militanteng Hezbollah asin mga suldado kan Israel.
Sa intrevista kan Bombo Radyo Legazpi kay Joyce Cortez an Bombo Internatioal News Correspondent kan Lebanon, maski pa may mga nangyayari ng ribayan nin pag-atake asin dangog na an pagsabog sa saindang lugar sa Beirut, desidido man giraray an mga Pilipino na magpadagos sa saindang trabaho.
Kadaklan kan mga overseas Filipino workers an mas nahahadit sa kawaran nin kabuhayan asin trabaho sa Pilipinas.
Segun kay Cortez, pig-aabisohan na sana sinda kan mga amo na maging handa sa posibleng pag-ebakwar en kasong magkaigwa nin gera.
Alagad may mga nagkakapira naman na Pinoy an nagsabay na sa repatriation asin nakabalik na sa Pilipinas nganing makaibanan an saindang pamilya.
Sa ngunyan, may mga paminsan-minsan ng pagsabog na nadadangog sa kapitolyo kan Beirut alagad padagos man giraray an normal na buhay kan mga residentes lalo pang nasanay na an mga Lebanese sa siring na sitwasyon.
