LEGAZPI CITY – Namamatean kan nagkapirang Pilipino an tensyon kan kariribukan sa Nepal huli sa mahiwasang hiro protesta kan mga anti-government.
Segun ki Bombo International News Correspondent Vanessa Villegas sa intrevista kan Bombo Radyo Legazpi na kadiit-diit an nadadangog ninda an tanog kan ambulansya, putok nin badil, pagsabog nin mga gas cylinder sa mga nasusulong harong na nagtatao man sainda nin stress huli ta naghahalat na sana sinda kan update.
Sa kagayunan suboot an protektado sa presente an saindang nateteniran mantang dae man ninda piglalaoman kun ano an pwedesir mangyari sainda enkaso magluwas sinda.
Kinumpirma niya man na nasulo nin buhay an agom ni former Nepali prime minister Jhala Nath Khanal makalihis na ma-trap ini sa nasusulo nindang harong asin bako intensyon na suluon.
Pigtaram pa kaini na uminabot sa 5,000 na mga nakadetine sa mga kulungan an nakalaya makalihis na rumpagon man kan mga ralihista an mga darakulang police station asin makuwa an mga badil.
Maski suboot nagpapadagos an kariribukan sa naunambitang nacion, padagos man an iba sa pagbukas kan saindang negosyo huli sa ipigbugtak na oras para sa pagbakal kan saindang mga pangenot na pangangaipuhan asin pigsasarado man tuyong curfew hours.
Padagos man an pakikipag-koordinar sainda kan konsulada kan Pilipinas para sa posibilidad kan repatriation enkaso maglala pa an tension sa Nepal mantang dae man sinda pigpapabayaan kan company na pigta-trabahuhan niya.
Pagdoon man ni Villegas na kan panahon na pigsusulo an mga harong kan pulitiko asin opisina kan gobierno an dae sinda makahagad nin tabang asistensya sa mga bumbero huli ta maski an saindang ofisina an dae man pinatwad kan mga ralihista na suluon.
