LEGAZPI CITY—Ikinadesganar kan mga nagkapirang Overseas Filipino Workers (OFWs) sa Hong Kong an mga dae naisakatuparan na mga promesa ni dating Presidente Rodrigo Duterte.
Segun ki UNIFIL-Migrante HongKong Chairperson Dolores Balladarez, sa intrevista kan Bombo Radyo Legazpi, saiyang pighayag an mga nagkapirang promesa kan dating Presidente kun saen enot na digdi na papaulion niya suboot an mga OFW para tawan nin trabaho sa Pilipinas, alagad hanggang sa ngunyan dae man naisakatuparan ini.
Panduwa an saindang agrangay na perwisyo kan overseas of employment certificate na kun saen tatangkason suboot ini ni Duterte alagad dae man ini nangyari.
Pantulo, kan administrasyon man suboot ni Duterte mas nagdakol an mga mandatory fees na pigbayadan kan mga OFWs.
Afuera digdi, an promesa man suboot kaini sa mga ayuda sa mga OFWs na en kaso na magkaghelang sinda makakakua nin tabang pinansyal alagad dae man nangyari.
Siring man an pasakit mapadapit sa ayuda asin an war on drugs.
Segun ki Balladarez, an mga ini an nagkapira sa mga sitwasyon na nagpapadificil sa saindang mga OFWs.
Mientrastanto, padagos man na nangagapudan ini sa gobierno siring kan pandadaya suboot kan mga recruitment agencies sa pagkolekta nin fees sa mga trabahante; mandatory fees; pagtangkas sa compulsory insurance; suportaran an pangapudan para sa living wage sa Hong Kong; magkaigwa nin toltol na seguridad asin serbisyo, asin pagkakaigwa nin mas dakol na trabaho sa Pilipinas nganing dae na sinda magpasiring sa ibang nacion.
