LEGAZPI CITY – Dae nakaligtas asin nalubog na sa baha an nagkapirang barangay sa banwaan kan Pioduran sa provincia kan Albay huli sa pag-uuran na dara kan habagat.
Segun ki Pioduran Municipal Disaster Risk Reduction and Management Office Head Noel Ordoña sa intrevista kan Bombo Radyo Legazpi na afuera digdi an nagkaigwa man nin pagrasay nin daga, pagbagsak nin tulay asin kinaipuhan pang i-ebakwar an mga pasyente sa sarong hospital huli sa lagpas tuhod na baha.
Nagin padifisilan man suboot an pag-ebakwar ninda sa labi 34 na pasyente huli ta an iba an kaipuhan na kasabay an mga oxygen tanks kaini.
Sa hiling niya man na kun magpapadagos pa an pag-uuran an posible pang maghalangkaw pa an naeeksperyensyahang pagbabaha sa saindang lugar.
Pigtaram pa kan opisyal na may mga kakalsadahan man na dae na naagihan kan saradit na behikulo kun kaya mawot nindang maghagad nin tabang sa Philippine Army nin mga trucks na pwedesir gamiton sa pagrescue kan mga evacuees asin mga stranded.
Sa kagayunan suboot an nagkondusir sinda nin clean-up kun kaya hababa sana an baha na namamatean ninda kompara kan dati na pigsasabayan pa nin hightide.
Sa presente wara mang patod an saindang profiling kaiba an Department of Social Welfare and Development nganing maaraman an eksaktong numero kan mga indibidwal asin pamilya na nagtetenir ngonian sa mga evacuation centers.
Pagirumdom ni Ordoña sa publiko na kun bako man importante an saindang dudumanon an dae na magdiretso huli sa mga manlain-laing pagbabahang na-eksperyensyahan sa banwaan asin kun kaipuhan talaga an ibitaran an marikas na pagpapadalagan kan saindang mga motorsiklo huli sa mga nagkaralat na mga debree na epekto kan warang patod na pag-uuran.
