LEGAZPI CITY- Arestado na an number 1 most wanted person sa provincia kan Catanduanes na suspek sa panghahabon asin panggagadan sa sarong paratukdo sa banwaan ka Caramoran sa ikinasar na operasyon kan mga otoridad sa Quezo City, Metro Manila.
Binisto an suspek na si Bernardo Asanza 65 anyos na sarong dating jail warden.
Sa intrevista kan Bombo Radyo Legazpi kay Police Major Edgar Clerigo an tagapagtaram kan Catanduanes Police Provincial Office, pigtuturo an suspek na master mind sa panggagadan sa public school teacher sa Caramoran na si Mel Rose Baloloy Nobyembre 4 kan nakalihis na taon kaiba an duwang iba pa na naenot ng naarestar.
Segun kay Clerigo, kan makumpirmar kan PNP an lokasyon kan suspek na nagtatago sa Quezon nakipagtabangan an Caramoran PNP sa Cubao Police Station 7 ngani na maglunsar nin operasyon.
Matrayumpo man na naarestar si Asanza na tulos na dinara sa Caramoran Municipal Police Station para sa magkakanigong disposisyon.
Nahahampang an suspek sa kasong Robbery with Homicide na wara nin pigrekomendar na piyansa
