LEGAZPI CITY – Pighihiling ngonian na dakulang tabang sa naglalangkaw na kaso kan dengue sa manlain-lain na parte kan nasyon an pag-reproduce kan mosquito fish.
Pag-eksplikar ni Bureau of Fisheries and Aquatic Resources (BFAR) Bicol spokesperson Nonie Enolva sa intrevista kan Bombo Radyo Legazpi, enot na ginamit an sira sa Central Luzon, tulong dekada na an nakakaagi sa pagkontrol kan malaria cases.
Pigkakaon suboot kan mosquito fish an mga kiti-kiti kaya posible man na magin solusyon sa halangkaw na kaso kan dengue sa Pilipinas.
Segun ki Enolva, kayang mabuhay kan nasabing klase kan sira maski sa stagnant water asin magpadakol sa laog sana nin nagkapirang semana kaya dakulang tabang ini sa pag-kontrol kan mga kiti-kiti na nagigin lamok.
Dugang pa na igwang mga mosquito fish na pwedesir na ma-reproduce sa opisina alagad aminado an opisyal na dae ini marhay natatawan nin atensyon sa presente huli ta mas nakatutok an BFAR Bicol sa production kan mga sira na makakaon kan tawo.
